Претприемништво (нова студиска програма)

Изучувањето на претприемништвото на сите нивоа на образование и во контекст на доживотното учење е мошне значајно и за Република Македонија. Ова значење се однесува на можностите за самовработување, создавање на нови бизниси, како и за растот и развојот на МСП, а на таков начин и за целокупниот социо-економски развој.

Изучувањето на претприемништвото е поврзано со современите научни сознанија, од кои треба да се развиваат нови, современи вештини и компетенции за создавање и развој на бизниси и унапредување на конкурентноста на националната економија. Од тука, студиската програма за последипломски студии по претприемништво, Економскиот институт Скопје ја темели освен на потребите за вештини и знаења барани на пазарот на работна сила во Република Македонија и пошироко, уште и на современите научни достигнувања од областа.

Поаѓајќи од акумулираното искуство на Економскиот институт во областа на претприемништвото, што значи, следење на истражувања и развој на истражувачки и образовни проекти и програми, како и поврзување со научни и образовни институции од земји членки на ЕУ и пошироко, оваа студиска програма е развиена врз принципите на компатибилност со соодветните студиски програми на водечките институции од оваа област.